Unha xogada do noso compañeiro do equipo de modestos Diego, deu moito que falar en tódolos sitios alá onde vai o equipo. Hoxe, o diario deportivo Marca dedícalle a portada en exclusiva … e é que hai cousas que xamais pasan desapercibidas. 

Tarde de estrea no Cardeal Quiroga na que o ClubDeportivoMaceda se medía a o C.F. Cortegada no seu regreso á primeira categoría do fútbol provincial.

Comezou o partido cos nervios propios da altura da temporada na que estamos, os dous equipos con moitas dúbidas e temerosos de encaixar un gol que os fixese ir a remolque o resto do partido. Esa incertidume quedou plasmada aos dez minutos cando un oco na defensa macedana colocou a Igor só fronte ao cancerbeiro Iván, o balón foise lambendo o pau da portería local.

O ClubDeportivoMaceda daquela xa sabía que calquera erro nesta nova categoría lle suporía un desgusto. A confirmación a estes medos chegou nun saque dende o curruncho, a despistada defensa local viu como o balón pasaba de longo ata chegar ao borde da área dende onde un xogador visitante o enviaría ao fondo da meta vermella. O 0 - 1, nunha xogada de estratexia mil veces defendida e atacada, subiulle as cores aos nosos.